jueves, 27 de abril de 2017

1 Mayu: Contra’l paru y la emigración, puxando pol socialismu


Llega un añu más el 1 de Mayu, y pa la mocedá de clas trabayadora nel nuesu país, la situación nun ameyoró: siguimos careciendo’l paru, la precariedá y la emigración a la que mos conderguen les estructures capitalistes del Estáu español y les sos sucursales n’Asturies, onde toles cifres evidencien esto que tamos manifestando.
L’avieyamientu poblacional, un paru xuvenil penriba’l 50%, unes cifres de temporalidá de más del 90% nos nuevos contratos firmaos dende cuantayá, o les discriminaciones de xéneru esistentes nel tarrén llaboral y nel restu d’ámbitos de la vida, son dalgunes de les cuestiones que podemos señalar, pero podríen ser otres munches.
Sicasí, dende Darréu nun queremos quedanos nes cifres negatives y consideramos que, más qu’un motivu pa la negatividá o pa l’apatía, son motivu pa facer medrar la llucha y la reivindicación por un futuru dignu pa la mocedá nel nuesu país, fechu que ye imprescindible non solo pal coleutivu mozu en sí, sinón tamién pa qu’esti país en conxuntu puea cuntar con porvenir. Poro, paeznos perimportante salir a la cai esti día, pero tamién siguir construyendo alternatives y movimientu dende Asturies, p’Asturies, dende la mocedá, y pa la mocedá. 
Defendemos por ello la soberanía pal nuesu pueblu como única ferramienta que mos va a garantizar la posibilidá de desarrollar, vertebrar, tresformar y ameyorar el país en tolos sos aspeutos políticos, sociales, económicos, etc., y esa soberanía pasa inevitablemente pela superación del capitalismu y la construcción d’un sistema xustu ya igualitariu: el socialismu. Nun ye namái posible y viable: ye necesario. L’Asturies capitalista y sumisa qu’anguaño carecemos, va camín del esaniciu económicu, social, cultural… Ye dicir, de la falta de futuru.
L’1 de Mayu, amás d’una fecha d’alcordanza y arguyu poles lluches obreres pasaes n’Asturies, tien de ser una fecha de llucha, combatividá y espardimientu d’estos finxos, polo que llamamos a la mocedá a participar na manifestación entamada por CSI, CGT, CNT y SUATEA (Plaza L’Humedal – Xixón - 12:30 hores) dientro’l bloque ‪#‎LluchandoPolaSoberanía, col sindicalismu combativu y cola iniciativa xunitaria pa defender otru camín p’Asturies.


Bloque Soberanista: https://www.facebook.com/events/1476047972469107/

jueves, 20 de abril de 2017

Charra-alderique - Prostitución: Diferentes postures dende'l movimientu feminista



El prósimu xueves 27 d'abril dende les 19:00 va tener llugar nel Llar La Llegra una charra-alderique sobre un tema tan interesante como polémicu: la prostitución.

Pa ello, queremos cuntar con voces y posicionamientos diversos, col envís d'aldericar, conocer, cuestionanos, y siguir formándonos pa construyir dende la mocedá una Asturies llibre, inclusiva, igualitaria y emancipatoria.

Vamos cuntar con Silvia Fernández (Estudiante de Promoción d'igualdá de xéneru y precaria), Karelis Contreras (Bolivariana, Estudiante de Promoción d'Igualdá de xéneru y parte de l'asociación El Ariete), asina como toa aquella persona que quiera apurrir la so visión.

¡Asperámosvos!

miércoles, 19 de abril de 2017

Un Gazte Akelarrea enllenu d'internacionalismu




Darréu tuve presente como delegación internacional nel alcuentru entamáu poles organizaciones vecines Ernai y Aitzina. Nesta edición la organización escoyó combinar los distintos formatos que veníen desarrollándose nestes feches: martxa, formación y ociu conformaron lo que foi’l GAZTE AKELARREA, alcuentru de miles de mozos y moces n’Euskal Herría.

L’apueste internacionalista foi grande, llegando a tar presentes delegaciones internacionales de toles organizaciones hermanes del Estáu, asina como de Noruega, Grecia, Alemañaa, Sicilia, Escocia, Bretaña, Córsica, Brasil, Ecuador y Colombia. Agradézse a la organización l’espaciu de convivencia ufiertáu pa que toes estes organizaciones disfrutáramos, conóciendonos y entendiendo otres realidaes, amás de conocer la situación d’Euskal Herría y de les organizaciones protagonistes, que sirven como modelu de llucha ya organización.

Conocer ya deprender d'otros pueblos ye importante, pero amás d'esto, entendemos que la presencia de Darréu nestos espacios sirve pa dar a conocer la nuesa realidá y que s’entienda que la lliberación d'un pueblu nun llega ensin el sofitu y solidaridá del restu de pueblos oprimíos.

Demostración d’años de llucha, de constancia, d’adaptación, d’identidá, d'organización, d'ilusión, pero tamién de munchu sufrimientu y represión  que combinen convirtiendo a Euskal Herría nun pueblu fuerte ya decidíu  n'algamar la so lliberación de la mano de la independencia, el feminismu ya'l socialismu.

PUXA L’INTERNACIONALISMU

lunes, 17 de abril de 2017

Escontra l’imperialismu, ¡soberanía popular!




Durante les últimes selmanes venimos asistiendo a una nueva escalada imperialista protagonizada polos Estaos Xuníos, principalmente en Siria pero tamién espardiéndose la tensión a otres fasteres como ye la península coreana.
 
Una vegada más, vemos cómo dende la primer potencia mundial s’inora toa llegalidá internacional y la soberanía p’atacar oxetivos que, baxo la escusa de defender la democracia y la llibertá, nun faen más que dir a la escontra de tou aquel gobiernu que nun atienda a los intereses del imperialismu hexemónicu: y como ye bien sabíu, ésti nun tien la democracia, la llibertá, o los drechos humanos como verdaderos oxetivos, sinon que namái son una cortina pa esconder el puru y duru interés económicu y xeoestratéxicu. Igual que vimos coles denomaes “primaveres árabes” y les sos desastroses consecuencies n’estaos como Libia, o igual que vemos acaldía col amiguismu respeuto a estaos asesinos y antidemocráticos como Arabia Saudí, lo único que mueve a EE.XX y aliaos, ye’l porgüeyu de les sos élites, anque esti cueste vides.

Nesi sen, paeznos imprescindible remarcar esi “aliaos”, y ye qu’ún de los incondicionales ye ésti nel que s’atopa Asturies: l’español, dende la so pertenencia a instituciones títeres como la OTAN y les bases d’EE.XX, y tamién diplomáticamente dende’l so propiu facer y el de la Xunión Europea. Nun vemos más que complicidá pa coles matances, pa con aiciones que namái sirven pa dar aliendu al Estáu Islámicu y otros grupos fundamentalistes que vienen enllenando la fastera de terror y muerte.

Dende Asturies, y dende la mocedá, nun podemos más que refugar una vegada más les puerques aiciones d’un imperialismu xabaz que ye imprescindible frayar cuanto primero: tanto nel so sentíu “clásicu” d’espansión y control territorial, como nel sen de fase superior d’esti sistema capitalista que mos afuega. Y un arma imprescindible p’algamalo ye la soberanía popular, y en consecuencia l’antiimperialismu: la posición nidia de refugar dafechu cualquier intervención de les potencies imperialistes, pero tamién de caminar con enfotu haza modelos políticos, sociales, económicos… nos que seya’l pueblu trabayador quien tenga capacidá de decidir, y de facer. 

El camín pa la lliberación pasa pola soberanía popular, pol socialismu, por un mundu llibre del imperialismu asesín qu’achuquina vides acaldía. 

NIN GUERRA ENTE PUEBLOS, NIN PAZ ENTE CLASES
PUXA LA LLUCHA ANTIIMPERIALISTA

jueves, 6 de abril de 2017

¿Recuperación? ¿Baxa'l paru pa la mocedá?



Vienen asoleyándose nestos díes los datos del “mercáu llaboral” asturianu nel mes de marzu, y nos titulares mediáticos ye mayoritariu’l mensaxe triunfalista, de “recuperación”, de que les coses van meyor pa la clase trabayadora del nuesu país, y tamién pa la mocedá.

¿Ye eso una visión real? La rempuesta una vegada más, ye que non. Si bien ye cierto que la cifra de persones moces en paru ye menor que va un añu, esto ye engañoso si nun tenemos en cuenta que la cantidá de mocedá tamién ye menor: la crisis demográfica nun apara, siguen colando miles de moces y mozos fuera d’Asturies p’algamar una perspeutiva de vida mínimamente digna, y l’avieyamientu poblacional sigue medrando. Poro, ye lóxico que’l paru xuvenil mengüe, si mengua la mocedá: lo que nun mengua ye la proporción.

Per otru llau, tamién hai que cuntar con otra cuestión perimportante: la precariedá y la temporalidá. Dende va munchos años, vemos cómo’l númberu de contratos temporales firmaos, supera’l 90% del total, y nel casu de la mocedá tanto o mayor ye esta problemática. Pueden facete un contratu d’unes selmanes o d’unos pocos meses en condiciones precaries y que nun permiten vivir, pero de cara a les cifres de desemplegu, esto siguirá cuntando como “salir del paru”, cuando toes sabemos que ye pan pa güei y fame pa mañana.

Dende Darréu dicimos too esto una vegada más, porque nun ye nuevo: ye la dinámica carecía pola mocedá asturiano dende cuantayá, y precisamente por ello nun podemos parar de denuncialo y lluchar por alternatives que mos permitan una vida digna nel nuesu país, un futuru n’Asturies.

Ye evidente qu’enxamás va consiguise demientres teamos ataes de pies y manes por unes instituciones autonómiques inoperantes y que nun quieren selo, y por un Estáu español pal que nun esistimos, retayando nun 30% les inversiones nel últimu añu: nun hai polítiques empobinaes a iguar los problemes propios d’Asturies y la so mocedá, porque’l poder ta en manes de quien nin tien nin quier tener una visión propia p’Asturies, y entá menos dende parámetros que se salgan de la lóxica del mercáu capitalista y la so miseria pa la clase trabayadora, y la esplotación patriarcal.

El camín pa la mocedá, sigue siendo la llucha por un #FuturuNasturies, pola soberanía, el socialismu, y el feminismu.

¡QU’EMIGRE LA PATRONAL!

sábado, 25 de marzo de 2017

¡N'Asturies vamos con Palestina!


Ayeri quedó claro que ¡N'Asturies vamos con Palestina!

Pesie a la manipulación mediática abondes persones sofitaron la movilización pa sacá-y tarxeta roxa a Israel, al so apartheid escontra'l pueblu palestín. 

La mocedá soberanista participamos nel bloque #LluchandoPolaSoberanía entendiendo perimportante esi componente internacionalista, la denuncia del papel d'Israel y los sos abusos sofitaos por estaos como l'español, y al mesmu tiempu espeyando que refugamos la presencia nel nuesu país d'una seleición española impuesta, demientres secuestren les asturianes y torguen la posibilidá de que, si'l pueblu asturianu lo decide, les sos seleiciones deportives puean xugar n'eventos oficiales.

¡PUXA LA LLUCHA PALESTINA!
¡OFICIALIDÁ PA LES NUESES SELEICIONES DEPORTIVES!

miércoles, 8 de marzo de 2017

8 Marzu por una Asturies llibre de machismu


Un añu más llega’l Día Internacional de la Muyer Trabayadora, una fecha que pesie a la so institucionalización, caltién un perimportante conteníu pa la reivindicación, y pa completar un día más de los 365 que cada añu debemos dedicar a la llucha escontra’l patriarcáu.

Les muyeres asturianes alcontrámonos con una opresión adicional más qu’evidente, afitada en cuestiones como la brecha salarial, los mayores niveles de paru y precariedá, la violencia machista, la cosificación, los roles de xéneru nos que la muyer aveza a ser la principal perxudicada, o’l desendolcu de trabayos de cuidaos que nun son nin reconocíos pola sociedá como tal, nin remuneraos, en consecuencia.

Nesi sen, paeznos imprescindible siguir avanzando na creación y treslladu a la sociedá de mensaxes feministes y antipatriarcales dende la perspeutiva soberanista y de clase, puesto que nun ye posible una Asturies llibre ensin muyeres llibres, como tampoco ye posible ensin valtiar les estructures capitalistes pa cuya supervivencia ye imprescindible’l patriarcáu.

Ye imprescindible de la mesma manera treslladar estes cuestiones a una mocedá que nin na educación, nin nos medios, nin en cualquier ámbitu institucionalizáu, atopa un modelu distintu al espardíu dende’l poder: asina lo amuesa los esmolecedores datos de violencia machista na mocedá, asina como la perpetuación de formes tóxiques de rellación, roles de xéneru sometedores, etc, escontra los que nun queda más camín que lluchar y concienciar.

El 8 de marzu, como’l restu del añu, hai que reivindicar que tamos fartes de machismu nel nuesu país, na nuesa sociedá, nos nuesos cuerpos.

ASTURIES LLIBRE DE MACHISMU