lunes, 21 de febrero de 2022

Día Internacional de la Llingua Materna 2022

Nel Día Internacional de la Llingua Materna, la mocedá aragoneso, llioneso y asturiano reivindicamos l’usu y respetu de les nueses llingues propies. Los nuesos países son territorios amplios y diversos onde topamos un conflictu llingüísticu que tien que ver, en gran midía en dellos de los nuesos territorios, n’asuntos ideolóxicos ayenos a los propios falantes, que tuvieron permanentemente instrumentalizaos poles diferentes tendencies polítiques, utilizaos como simples armes nes sos batalles identitaries. En munchos casos el mayor problema vien de la falta de valor que-y dan los falantes a les sos propies llingües, que dempués de xeneraciones nuna situación de desigualdá llingüística, en munchos casos con grandes presiones sociales y polítiques, acaben por percibiles como inferiores frente a otres llingües con más prestixu social, nesti casu’l castellán, y poro, van abandonándoles: dende dexar d’utilizales nos espacios onde consideren que nun son válides, pasando por teneles relegaes al espaciu familiar, hasta por fin dexar d’enseñales y utilizales coles sos fíes y fíos, llevando asina a la desapaición efeutiva del idioma.

Aragón:
Na Franxa la llingua propia ye’l catalán, dende fai más de 850 años, y va ser la llingua oficial
hasta que nel 1707, nos “Decretos de Nueva Planta”, el castellán va imponese ente les
llingües propies del territoriu: el catalán y l’aragonés, relegáu güei día a la zona norte.
L’aragonés y el catalán nun tienen n’Aragón l’estatus d’oficiales. La única llingua oficial del
nuesu territoriu ye la llingua castellana, Esto significa que se vulneren sistemáticamente los
drechos humanos que tienen que ver colos aspeutos llingüísticos de tola población
aragonesofalante y catalanofalante, faciendo de les persones non castellanofalantes d’Aragón
ciudadanos de segunda clase.
La realidá llingüística d’Aragón ta permanentemente invisibilizada. La presencia pública ya
institucional de les llingües propies ye ínfima, por nun dicir nula, y los medios de
comunicación hexemónicos, públicos o privaos, tan íntegramente en castellán. Esto proyeuta
na población d’Aragón una percepción irreal, absolutamente castellanizada, de la realidá
llingüística del país. Les instituciones y los medios de comunicación folklorizaron les nueses
llingües hasta’l puntu de convertiles en simples curiosidaes rexonales, quitándo-yos el so
infinitu valor real como sistemes de comunicación y expresión de miles de persones nel
nuesu territoriu. Les escueles y les instituciones educatives españoles, en cuenta de ser
llugares d’enseñanza respetuosos cola nuesa realidá plurillingüe, fueron históricamente
centros d’asimilación cultural, “reeducación” y castellanización de la población aragonesa.
Durante años, foi habitual la represión, incluso física, contres los alumnos que nun
s’espresaben en castellán. Na actualidá, la presencia de l’aragonés y el catalán na enseñanza
ye irrisoria y estremadamente limitada.

País Llionés:
La sociollingüística del País Llionés ye de les más precaries d'ente los territorios baxo
l'alministración del estáu español tocantes a la normalización de les sos llingües
patrimoniales.
La llingua propia de les comarques más ocidentales ye'l galleguportugués nes modalidaes
gallegues orientales del Bierciu ocidental, l'Alta Senabria y el portugués rayanu d'Alamedilha
y Calabor. Cuenta con cierta vitalidá nestes comarques anque la demografía, la escasa
preocupación poles instituciones, la desatención, la nula presencia nos medios de
comunicación llocales, el nulu usu alministrativu y una presencia escasa na educación
enfocada d'una manera allonxada de la realidá llingüística de los sos falantes ponen difícil la
so pervivencia nun futuru ensin relevu xeneracional.
No territoriu restante, la llingua propia históricamente foi l'asturllionés o llionés, anguañu
arrequexáu a les comarques más norteñes y ocidentales del país que vive nuna situación total
de minorización y regresión que va suponer la imediata estinción nos pocos territorios nos
que tovía persiste. La perda de les fales llioneses supón un dañu irreparable al conxuntu del
asturllionés axebrando'l so territoriu y torgando la comunicación ente los otros territorios
onde tovía se fala. Nun tien nenguna presencia no sistema educativu más enfotáu nel
adoctrinamientu identitariu castellanu que pola pervivencia del patrimoniu cultural d'esta
comunidá. Tampocu tien presencia más que de xeitu anecdóticu y cuasi folclóricu na
alministración pública y prácticamente nenguna nos medios de comunicación locales.

Asturies:
Asturies vien de perder una oportunidá histórica d’algamar la oficialidá. Depués de 40 años
de reivindicación llingüística, les llingües propies d’Asturies —l’asturianu y el gallegu
asturianu— tuvieron más cerca que nunca de llograr una reconocencia llegal. Per primer
vegada na historia, el númberu de diputaos supuestamente a favor llegaba a los 27, esto ye, la
mayoría parllamentaria necesaria p’afrontar la reforma estatutaria propuesta pola FSA-PSOE
qu’incuyiría la oficialidá. Pero’l pruyimientu de la sociedá asturiana d’algamar, a la fin,
drechos llingüísticos, viose nuevamente torgáu pola falta de voluntá política, la farsa
gubernamental y el circu mediáticu.
Sicasí, frente a esti nuevu fracasu, el movimientu de reivindicación llingüística reafírmase
como ún de los movimientos más potentes, consecuentes y firmes d’Asturies. Y pesie a toles
torgues, l’asturianu y el gallegu asturianu non solo se caltienen, sinon que s’esparden. Nos
últimos años tamos asistiendo a un procesu de normalización que ñaz del pueblu y ye pal
pueblu (un espoxigue de la lliteratura y la música n’asturianu, empreses de tou tipu qu’usen
l’asturianu con total normalidá, una mayor concienciación ente la mocedá, etc.), y ye qu’énte
la falta de compromisu políticu, siempre foi la clas obrera quien curió y tresmitió los llegaos
heredaos. Per delantre: autoestima, autoxestión y trabayu de cai. Esti movimientu ye
imparable y vamos algamar la oficialidá.
Dende les organizaciones de Purna, Agora País Llionés y Darréu esiximos que les nueses
llingües cuenten con polítiques públiques d'enseñu, promoción, proteición; que se garantice la
so presencia nos medios de comunicación, na alministración pública. Pidimos un marcu que
de un tratu de dignidá a las nueses comunidaes llingüístiques patrimoniales y que se
garanticen los drechos de los sos falantes que se ven mermaos en comparanza colos falantes
de castellán. El marcu óptimu mínimu debiera pasar pola oficialidá a lo menos nos territorios
nos que tienen presencia y vitalidá les nueses llingües (tol territoriu nel casu d’Asturies), y
tamién nes ciudaes del país que reciben migración masiva destos territorios o qu’atiendan
servicios públicos destinaos a estes comunidaes.

                             

Esti testu puede lleese tamién en galego-portugués, aragonés, catalán y llionés nel siguiente enllaz:

sábado, 9 de mayo de 2020

75° Aniversariu Día de la Victoria

Cumplíu’l 75 aniversariu del Día de la Victoria, dende Darréu alcordámonos d’esti fechu hestóricu perimportante: el trunfu de la Xunión de Repúbliques Socialistes Soviétiques sobre l’Alemaña nazi. Millones de vides y sacrificiu abondu evitaron la perpetuación de la barbarie de les potencies nazi-facistes, que nun lo escaezamos: xubieron al poder gracies al apoyu de les élites económiques, de la burguesía de los sos países, que beneficiáronse del disciplinamientu de la clase trabayadora, l’achaplamientu de les sos organizaciones polítiques y sindicales, y con ello cualquier drechu social, llaboral, o llibertaes diverses.

Col pasu de los años, y principalmente tres la cayida del bloque socialista a entamos de los años 90 del sieglu pasáu, el cacarexáu “fin de la hestoria” traxo una potente propaganda, con Hollywood a la tiesta, p’afitar qu’esta victoria contra’l nazi-facismu tuvo nos Estaos Xuníos al principal protagonista. Ensin ñegar el papel militar de potencies como Gran Bretaña o los propios Estaos Xuníos, vese claramente un interés en tapecer la importancia non solo de la propia Xunión Soviética, sinon tamién de distintes fuercies antifacistes a lo llargo y ancho d’Europa y el mundu nel so combate, esfuerzu reflexáu nos millones de vides entregaes o nes perdes materiales. 

Una de les espresiones d’esti esfuerzu terxiversador ye esi autodenomáu “Día d’Europa”, empobináu por una Xunión Europea na que precisamente la tendencia actual ye l’establecimientu de midíes de calter anticomunista, la mayoría de les veces metiendo nel mesmu sacu esta ideoloxía y la nazi-facista. Y ye que nun podemos escaecelo: bona parte d’eses oligarquíes qu’ayeri sofitaron la barbarie, güei siguen teniendo un importante protagonismu n’Europa, anque eso sí: con una capina de barniz lliberal.

Dende Darréu, en consecuencia, paeznos pernecesario poner l’acentu en facer alcordanza, y en dar les gracies, a toles antifacistes que llucharon pola llibertá, y ente ellos, decenes d’asturianos y asturianes. Pero n’especial a les comunistes y el so determín clave pa que’l resultáu de la guerra fora l’afayadizu. 75 años depués, la llama sigue prendía. Sigue siendo imprescindible superar el sistema capitalista y construyir un socialismu que, adautáu al contestu hestóricu y social d’anguaño, garantice un futuru d’igualdá, paz, prosperidá y llibertá al pueblu asturianu y tolos pueblos del mundu.

PUXA LA LLUCHA ANTIFACISTA

martes, 8 de octubre de 2019

Crónica del DMR 2019


Una nueva edición del Día de la Mocedá Revolucionario tuvo llugar n'Uviéu los díes 4 y 5 d'Ochobre, xunciendo una vegada más l'alcordanza y reivindicación d'ochobre'l 34 coles problemátiques y lluches d'anguaño.

 

Les actividaes entamaben el vienres nel Llar La Llegra, onde foi momentu de deprender de les lluches de muyeres d'Ike, Modultec, y d'Euskalduna dende Euskal Herría. Asina, pudimos sentir de primera mano tanto les aiciones desarrollaes, como les torgues de xéneru coles que s'alcontraron nes sos lluches, pero sobre too quedámonos col so exemplu. Como elles mesmes apuntaben, anque'l momentu actual seya de mayor desmovilización ya individualismu, nunca hai que parar de puxar fasta dá-y la vuelta a la situación y consiguir que'l futuru seya un tiempu meyor.






El sábadu pela mañana yera'l turnu del internacionalismu xuvenil coles compañeres d'Ernai y Purna, llegaes dende Euskal Herría y Aragón respeutivamente. Nesta actividá intercambiáronse visiones y esperiencies sobre'l procesu de globalización, les dinámiques capitalistes, y cómo too ello afeuta a los nuesos pueblos. Darréu foi turnu d'un actu musical coles pandereteres Nun Tamos Toes, amestando reivindicación dende la tradición, pa depués dar pasu a la xinta popular.


Yá pela tarde volvimos a poner la mirada n'Asturies y dalgunes de les sos problemátiques actuales. Analizamos y aldericamos sobre ludopatía, cases d'apuestes, páxines web... y el so impautu na mocedá de la mano de l'asociación LARPA. Tamién hebo tiempu pa conocer les lluches y visiones del coleutivu del oeste xixonés La Rede, que mos fizo una interesante esposición de les munches problemátiques na zona y les lluches que desarrollen. Pa rematar, la Xunta Estudiantil Asturiana fizo un repasu de les lluches estudiantiles y la situación actual del movimientu estudiantil asturianu.

Pa finar coles actividaes del DMR 2019 nun podía faltar el XVI Asturies Nun Escaez, onde Sartenazo Cerebral, Skama La Rede y Radiocrimen punxeron la nota musical cola que rematar la xornada. Tamién hebo tiempu pa un pequeñu actu políticu col que dar homenaxe una vegada más a les heroínes y héroes del ochobre asturianu.






Con too ello dende Darréu agradecemos la presencia  toles convidaes, toles persones asistentes a los actos, y enfotámonos en siguir cola llucha xuvenil dende'l soberanismu, el socialismu y el feminismu.

PUXA OCHOBRE'L 34

domingo, 29 de septiembre de 2019

Actividaes DMR'19

Vienres 4 d'ochobre
19:00 Llar La Llegra (Uviéu)
Charra:"La llucha de les muyeres d'ayeri, exemplu pa la mocedá de güei :
- Muyeres d'IKE y Obrerol (Asturies)
- Muyeres d' Euskalduna (Euskal Herria) 


Sabadu 5 d'ochobre
Plaza'l Paragües (Uviéu)
12:00 Actu internacionalista (capitalismu y globalización).
13:30 Sesión vermú coles pandereteres Nun tamos toes
14:30 Xinta popular (5€). Hai opción vegana. Acutar en darreu.moceda@gmail.com
Llar La Llegra
17:00 Mesa redonda
-Educación (Xunta Estudiantil Asturiana).
- Contaminación (La rede Xixón oeste)
- Cases d'apuestes (Ludopatas Asociados en Rehabilitación del Principado de Asturias:
Sala Sir Lauren's (Uviéu)
19:30 Apertura puertes
20:00 Conciertu 8€ anticipada/10€ taquilla. Bonu sofitu online 5€
Sartenazo Cerebral + Skama la Rede + Radiocrimen

sábado, 12 de enero de 2019


📢 PEDÍU SUDADERES ASTURIES ANTIFACISTA📢
💶 22€
📩 Pídeles mandando un corréu lletrónicu a darreu.moceda@gmail.com poniendo nome, talla y un teléfonu contautu
📆 Plazu fasta'l 8 de Marzu
📦 Enviamos per corréu tamién a la "lleenda urbana".


miércoles, 24 de octubre de 2018

Crónica del DMR 2018


La fin de selmana del Día de la Mocedá Revolucionario 2018 entamaba cola concentración de protesta escontra los Premios Princesa, na que participamos dientro del bloque #LluchandoPolaSoberanía pa dexar bien claro que la mocedá asturiano nun tien rei, nin princeses, nin "Principado".



La xornada del sábadu entamaba col Alcuentru Internacionalista, cola presencia de delegaciones de Ruchar dende'l País Llionés y Arran dende Païssos Catalans, pa sentir ya intercambiar paeceres con Aby Athman, presidente de Cosara, alrodiu l'Autodeterminación del Pueblu Saharaui, qu'entá carez les consecuencies d'un conflictu colonial ensin iguar.




Tres la xinta, turnu pa la charra con Oskar Matute alrodiu "Repúbliques y procesos constituyentes, baltiando'l réxime del 78", na que'l diputáu d'EH Bildu nel Congresu espuso una visión soberanista y centrada nes clases populares y les sos reivindicaciones, que pasen necesariamente por frayar dende y pa los pueblos esti réxime que mos somorguia.

Pa rematar, los conciertos de Brutus Daughters, La Tarrancha y Fruela 757 nel XV Asturies Nun Escaez, nel que, como ye vezu, hebo espaciu pa un pequeñu actu políticu nel que tuvieron presentes los valores de la nuesa organización. Dende Darréu damos les gracies a toles ponentes, asistentes, a los grupos musicales, y a toa aquella xente que fizo posible un añu más el DMR. ¡Puxa la llucha de la mocedá!



lunes, 8 de octubre de 2018

Día de la Mocedá Revolucionario 2018



Asoleyamos el cartelu coles actividaes que van componer el Día de la Mocedá Revolucionario 2018, qu'esti añu tarán concentraes el sábadu 20 d'ochobre. Sicasí, el día enantes, vienres 19, hai una cita imprescindible na plaza La Escandalera, onde un añu más ta convocada la concentración escontra los Premios Princesa. Ellí taremos participando nel bloque #LluchandoPolaSoberanía pa volver a glayar bien alto qu'Asturies Nun Tien Rei, que la mocedá asturiano ta farta d'imposiciones y de corrupción.

El sábadu 20 entamaremos la xornada dende les 12:00 nel Llar La Llegra col Alcuentru Internacionalista, onde les organizaciones xuveniles desplazaes a Asturies van aldericar y esponer delles cuestiones sobre la realidá de los sos países -que diremos detallando-, poniéndoles en comuña pa deprender y avanzar. Depués d'ello, haza les 14:00, sedrá hora de reponer fuercies con una Xinta Popular (5 euros). 

Nel propiu llar, dende les 17:00, vamos cuntar con Oskar Matute (Diputáu d'EH Bildu nel Congresu), pa siguir afondando na reflexón y l'alderique, nesti casu alrodiu "Repúbliques y procesos constituyentes, baltiando'l réxime del 78". Yá pa rematar la xornada y el DMR 2018, el XV Asturies Nun Escaez na Sala Sir Laurens, de magar les 20:00.