Escontra la precariedá en Capgemini, nes cuenques y n’Asturies ¡Futuru pa la mocedá!

Esti sábadu 3 de febreru ta convocada una manifestación con entamu nel Parque Vieyu de La Felguera a les 18:00, col envís de denunciar la situación de cesión illegal y precariedá de cientos de trabayadores nuna de les empreses que más puestos de trabayu apurre na cuenca: Capgemini. Como consecuencia de reivindicar los sos derechos, cuatro trabayadores foron despidíos, faciendo too ello inaceutable nunes cuenques mineres esfarrapaes pol desmantelamientu industrial.

La mocedá asturiano sigue condergada a dos alternatives posibles: paru y precariedá n’Asturies, o emigración pa sobrevivir. Ante ello nun vemos más que pasividá d’unes instituciones y gobiernos a los que nun-yos interesa pa nada la suerte del nuesu pueblu y la so mocedá, que sufre les tendencies cada vegada más fuertes del capitalismu a la escontra de los derechos llaborales y tolo que suponga una rempuesta obrera organizada énte los sos atropellos. 

Ye por ello perimportante qu’esti sábadu les cuenques mineres, pero tamién el restu d’Asturies, salgamos a la cai pa dicir que yá valió, que tamos fartes de que mos obliguen a emigrar, de que mos desmantelen el texíu industrial dexando la nada como alternativa, de que mos roben a la cara y mos esploten dende la conocía impunidá llegal ya institucional cola que cunten dende l’empresariáu. 

POR UN FUTURU PA LES CUENQUES MINERES

POR UN FUTURU P’ASTURIES

CAPGEMINI SOLUCIÓN